நன்றி இறைவா!

கடினமாய் உழைத்துத்தான்

குடும்பத்தைக் காப்பாற்றும்

கஷ்டமான சூழலில்

கடவுளே என்னைநீ வைத்துள்ளாய்.

ஆனாலும் உனக்கு நன்றி இறைவா – அதனால்தான்

களைப்பு என்னிடம் கழன்றுவிட்டது.

பதவிகளைப் பிடித்து

பணம்அதிகம் பண்ணத்தெரியாத

பத்தாம்பசலி மனிதனாய்

பகவானே என்னைநீ வைத்துள்ளாய்.

ஆனாலும் உனக்கு நன்றி இறைவா – அதனால்தான்

குணம் என்னிடம் குடிகொண்டுள்ளது.

திறமைகள் மிகுந்திருந்தும்

திருப்பங்களைக் காணாமல்

திக்கற்று நின்றிடவே

தெய்வமே என்னைநீ வைத்துள்ளாய்.

ஆனாலும் உனக்கு நன்றி இறைவா – அதனால்தான்

முயற்சி என்னிடம் முளைத்துவருகிறது.

பாமாலைபாடி பூமாலைசூட்டி

பலவிதமாய் துதித்தும்

பலனேதும் கிடைக்காதவனாய்

பரம்பொருளே என்னைநீ வைத்துள்ளாய்.

ஆனாலும் உனக்கு நன்றி இறைவா – அதனால்தான்

பக்தி என்னிடம் பற்றிக்கொண்டுள்ளது.

-    பத்மன்